(ម៉ានីឡា)៖ ទីភ្នាក់ងារសារព័ត៌មាន Reuters បានចេញផ្សាយព័ត៌មានមួយថា ប្រធានាធិបតីហ្វីលីពីនលោក Rodrigo Duterte បានទទួលចាក់វ៉ាក់សាំងដូសដំបូង នៃវ៉ាក់សាំងបង្ការជំងឺកូវីដ-១៩ របស់ក្រុមហ៊ុនចិន Sinopharm នៅថ្ងៃច័ន្ទ ទី៣ ខែឧសភានេះ ដើម្បីលើកទឹកចិត្តប្រជាជនហ្វីលីពីន ដែលមានការស្ទាក់ស្ទើរក្នុងការទទួលចាក់វ៉ាក់សាំងនេះ។ នេះបើយោងតាមការឱ្យដឹងពីមនុស្សជំនិតរបស់លោកប្រធានាធិបតីហ្វីលីពីន។
លោក Christopher Go សមាជិកព្រឹទ្ធសភា និងជាជំនួយការដ៏ជិតស្និទ្ធបំផុតរបស់ប្រធានាធិបតីបានធ្វើសេចក្តីថ្លែងការណ៍មួយថា លោក Duterte បានទទួលចាក់វ៉ាក់សាំងបង្ការជំងឺ COVID-19 ដូសទី១ របស់ក្រុមហ៊ុន Sinopharm ដែលបច្ចុប្បន្ននេះលោកប្រធានាធិបតីមានអាយុ ៧៦ឆ្នាំ។
កំឡុងពេលចាក់វ៉ាក់សាំង ក៏មានការផ្សាយផ្ទាល់លើបណ្តាញសង្គមហ្វេសប៊ុក ដោយលោក Duterte បាននិយាយថា «ខ្ញុំមានអារម្មណ៍ល្អ ហើយខ្ញុំរំពឹងថានឹងបានចាក់វ៉ាក់សាំងនេះជាយូរមកហើយ»។
គួរបញ្ជាក់ថា ពាក្យស្នើសុំប្រើប្រាស់បន្ទាន់របស់វ៉ាក់សាំង Sinopharm នៅក្នុងប្រទេសហ្វីលីពីន នៅតែស្ថិតក្នុងស្ថានភាពរង់ចាំនៅឡើយ ប៉ុន្តែនិយតករស្បៀងអាហារ និងឱសថរបស់ប្រទេសនេះ បានយល់ព្រមឲ្យប្រើប្រាស់វ៉ាល់សាំងនេះ ចំនួន ១០,០០០ដូសសម្រាប់ព័ត៌មានលម្អិតអំពីសុវត្ថិភាពរបស់វា។រហូតមកទល់ពេលនេះ ហ្វីលីពីនបានកត់ត្រាករណីឆ្លង COVID-19 សរុបចំនួន ១.០៦លានករណី ក្នុងនោះស្លាប់ ១៧,៥២៥នាក់ ដោយឈរចំណាត់ថ្នាក់លេខពីរ នៅក្នុងចំណោមប្រទេសសមាជិកអាស៊ាន តាមពីក្រោយប្រទេសឥណ្ឌូនេស៊ី៕